1Cor 16 | TUCO | STEP | Yo, you leg saveeŋ ris payam pa yaam to aghaze aŋgooga pa Krisi tamtoghon toni to tineep izi Yerusalem. You naghita naghaze ataam to naghuri pa lupuuŋ to Maaron to tineep izi taan suruvu to Galesia, yam ataghoni paam, ghoro poia.

aMbaŋ 24:17; Ro 15:25+; 2Kor 8:1+

bMbaŋ 20:7

c2Kor 1:16; Kol 4:3; Syg 3:8

d1Kor 4:17

eMbo 31:24; Ep 6:10

f1Kor 13:1+; 1Pe 4:8

g1Kor 1:16; Pil 2:29; 1Tim 5:17; Hib 13:17

hMbaŋ 18:2,18,26; Ro 16:3,5

iRo 16:16

jKol 4:18; 2Tes 3:17

1 Corinthians 16

Paulus ipalot yes Korin pa tiuul nditadi to tineep izi Yerusalem

1 Yo, you leg saveeŋ ris payam pa yaam to aghaze aŋgooga pa Krisi tamtoghon toni to tineep izi Yerusalem. You naghita naghaze ataam to naghuri pa lupuuŋ to Maaron to tineep izi taan suruvu to Galesia, yam ataghoni paam, ghoro poia. ^a

2 Wik to naol ne, ndag to ivot muuŋ, yam eŋaeŋa irau aghur yaam tiam pida ila saguan itaghon uraat tiam atia. Leso ivot inim tiina, ve isaŋan pa sawa to nalat. Ataghon aliŋag tonene, ghoro poia. Pasa, ighaze nalat peria ve aŋgooga sone, nene pale poia maau. ^b

3 Ve aghur tamtoghon tiam pida to aghita di aghaze tiraua, leso tigham yaam to aŋgooga ne ila to toŋvetaz toit to tineep izi Yerusalem. Sawa to nalat, you pale nambood rau pida tinim paesiiŋ padi, leso tikis di ve tila. 4 Ve ighaze naghita naghaze poia pa you paam nala, nene pale yeiŋa nila.

Paulus ipaesia laghooŋ toni

5 You nagham ŋgar naghaze nala naghita nditaad pida to tineep irau taan suruvu to Masedonia. Tovenen you pale nala naghita di muuŋ. Le isob, ghoro nalat naghita gham. 6 Ve naghaze naneep toman gham mala ris. Tovenen matag iŋgal naghaze naneep toman gham le sawa to ndug yauŋa isob, ghoro yam irau aghita ghou pa laghooŋ tiou, ve aghur ghou nala pa ndug sine to naghaze nala pani. 7 Lolog pa naŋgig gham moghon ve nala maau. Tovenen ighaze Maaron lolo tovene, nene pale itiŋa taneep mala ris. 8 Eemoghon irau nala Masedonia rikia maau. Pale naneep izi ndug Epesus le irau lupuuŋ tiina to Pentekos ivot, ghoro nala. 9 Pasa, Maaron ikaak ataam payou pa nagham uraat tiina izi sualen. Ve naghita naghaze uraat tiou ighurghur anoŋa. Eemoghon ival tiina tizorzoor saveeŋ tiou paam. ^c

Paulus ipaes padi pa Timoti ve Apolos

10 Ighaze aghita Timoti ilat peria tiam, yam aghami toman lolomim poia. Leso sawa to ineep toman gham, imatughez sob, ve lolo poia. Pasa, ye ighamgham uraat to Tiina toit Krisi, raraate inimale you. ^d

11 Tovenen tamtoghon eta mata izi pani malep. Ve sawa to ye ipamundigin laghooŋ toni muul, yam auuli, ve aghuri ila toman lolo poia, ve imuul inim tiou. Pasa, you nasasaŋani toman toŋvetaz toit pida.

12 Toŋvetaz toit Apolos, sawa naol, you nasavsaav ariaŋa pani naghaze yesŋa toŋvetaz toit pida tilat tighita gham. Eemoghon lolo pa ilat pa sawa tonene maau. Pale ighita soso eta, ghoro ilat ighita gham.

Paulus ipasob saveeŋ toni

13 Matamim imosmoos ve ayoon ariaŋa pa ghurla tiam. Amatughez malep. Apariaaŋ taumim, ve ayoon tuŋia. ^e

14 Ve sa ŋgar to aghaze aghami, yam aghami itaghon ŋgar to lolood pa tamtoghon. ^f

15 Yam awatag: Stepanas ve yes to tineep tomani ila ruum toni, timuuŋ pa yam Akaia asob, ve tighur ila to Krisi muuŋ. Ve yes tirei taudi pa uraat to Tiina toit, ve timbesmbees kat pa tamtoghon toni. Ndiran tovene, toman tamtoghon tisob to tiuluul di ve tipul taudi kat pa uraat to Maaron, you naghaze napalot gham pa aneep ila sambadi, ve alooŋ aliŋadi. ^g

17 Sawa to Stepanas toman Portunatus ve Akaikus tinim tivot tiou, yes tigham lolog poia kat. Onoon, yam ival irau anim maau. Eemoghon yes tigham naghomim ve tinim tivot, ve tiuul ghou pa mbeb pida. 18 Tauto tipalot ghou ve tigham ateg izi, inimale moghon moghon tighamgham payam. Tamtoghon tovene, yam irau apait di.

19 Lupuuŋ tisob to Krisi to tineep izi taan suruvu to Asia ne, tigham ndag poia todi ilat payam. Akwila yesuru Prisila toman yes to tiluplup di pa suŋuuŋ ila ruum todi ne, lolodi payam kat. Tovenen yes paam tigham ndag poia todi ilat payam ila Tiina toit iza. ^h

20 Ve toŋvetaz to Krisi to yeiŋa ninepneep ne paam, tisob tigham ndag poia todi ilat payam.

Yam asob toŋvetaz to Krisi. Tovenen lolomim poia pa taumim ve awakisin nimamim. ⁱ

21 Nene you Paulus. Nambood ndag poia tiou tonene ilat payam pa taug nimag. ^j

22 Ighaze tamtoghon eta lolo pa Tiina toit maau, nene pale mbalmbali to Maaron iza toni.

O Tiina tiei, unum lak! ^{▼▼(16:22) Paulus imbood saveeŋ waaro tonene ila yes Aramea aliŋadi. Ighaze: ‘Marana ta.’}

23 Poia to Tiina toit Yesu ineep toman gham.

24 You lolog pa yam asob. Pasa, Yesu Krisi ilup ghiit ve taneep ila toni.